ViuTV綜藝節目《造美人》近日熱播，其中一位參賽者芷橋極具話題性，佢喺節目自爆近年為咗男朋友想令自己變靚啲，前後豪花40萬去健身、箍牙、割雙眼皮同埋隆鼻，芷橋喺節目上更加爆喊，認為自己整容都係想做一個合格女人，返到後台佢仲崩潰話：「可唔可以教我點樣愛自己？點解我要係女人？」
廖嘉敏 臨床心理學家表示，現時行為成癮主要針對賭博、酗酒、濫藥行為，而整容未被列入臨床上嘅上癮行為。至於重複整容背後可以有各種唔同成因，當中有機會源於偏執思想，患者認為身體有一個或數個「缺陷」而感到非常困擾，嚴重者更可能達到妄想程度，希望透過整容改善外觀，但往往喺整容後依然不滿而不斷整容修補，而頻密整容亦都可能係到受情緒問題好似抑鬱或者焦慮影響。
廖嘉敏續指，整容唔一定代表有心理問題或困擾，對於因為整容出現心理困擾而尋求心理治療嘅人，心理學家會首先協助求助者分析核心問題所在，等患者理解整容行為背後所反映嘅內在心理需要，重新認知有關經歷帶來嘅想法同情緒，並重新欣嘗同接納獨特嘅自己。
至於如何先算係芷橋口中嘅「合格女人」呢? 廖嘉敏指，每個人都有自己嘅價值觀，有自己認為值得努力嘅方向，好難斷言係咪錯誤，但佢提醒大家，價值觀係咪全然取決於個人外表呢? 其實女性嘅美同美德可以從好多唔同層面彰顯，也許開濶一點呢個定義會發現自己其實都好美！
媒體平台：Go Fever 高燒醫療健康資訊
內容提供：廖嘉敏女士 香港心理學會臨床心理學組 註冊臨床心理學家